15. sep. 2021

Samgönguvika 16. -22. september

Evrópsk samgönguvika verður haldin dagana 16.-22. september 2021. Samgönguvika er evrópskt átak um bættar samgöngur í borgum og bæjum. Í ár er yfirskrift samgönguvikunnar ,,Veljum grænu leiðina -fyrir umhverfið og heilsuna".
Garðabær tekur þátt í samgönguvikunni sem fyrr ásamt sveitarfélögum víðs vegar um allt land.

Bíllausi dagurinn er í ár haldinn miðvikudaginn 22. september. Á þeim degi eru íbúar sérstaklega hvattir til að nota aðra ferðamáta en einkabílinn.

Frá árinu 2002 hafa borgir og bæir á Íslandi tekið þátt í samstilltu átaki sveitarfélaga í Evrópu um að ýta undir sjálfbærar samgöngur. Markmið vikunnar er að kynna íbúum í þéttbýli samgöngumáta sem allt í senn eru vistvænir, hagkvæmir og bæta heilsu fólks um leið og þeir hafa jákvæð áhrif á umhverfi og andrúmsloft.

Garðbæingar eru hvattir til að kynna sér dagskrá Samgönguviku og fara út að hjóla, ganga eða hlaupa. Í leiðsagnarappinu Wappinu má finna fjölmargar skemmtilegar göngu- og hjólaleiðir í Garðabæ. Leiðirnar eru með kortum, gps hnitum, ljósmyndum og upplýsingum á íslensku og ensku.

Frekari upplýsingar um Evrópska samgönguviku á Íslandi má finna á Facebook-síðu vikunnar.