Stjarnan leikur til úrslita í bikarkeppnum kvenna og karla
Bæði lið kvenna og karla í Stjörnunni leika til úrslita í Mjólkurbikarnum í knattspyrnu. Kvennalið Stjörnunnar mætir til leiks á Laugardalsvellinum í kvöld, föstudaginn 17. ágúst kl. 19:15, þar sem liðið mætir Breiðablik.
-
Æfing hjá Stjörnunni -
Æfing hjá Stjörnunni
Stjarnan stendur sig vel í fótboltanum þessa dagana. Bæði lið kvenna og karla leika til úrslita í Mjólkurbikarnum og mæta þar liðum Breiðabliks og er það í fyrsta sinn sem bæði þessi nágrannafélög mætast hjá konum og körlum í úrslitunum.
Fyrsti úrslitaleikurinn í kvöld
Kvennalið Stjörnunnar mætir til leiks á Laugardalsvellinum í kvöld, föstudaginn 17. ágúst kl. 19:15, þar sem liðið mætir Breiðablik. Þar verður hörkuleikur á ferð en bæði liðin hafa oft leikið til úrslita en aldrei mæst áður í bikarúrslitum. Stjarnan er í bikarúrslitum í fimmta sinn á síðustu sjö árum en liðið varð bikarmeistari árin 2012, 2014 og 2015 en tapaði gegn ÍBV í úrslitaleiknum í fyrra.
Á fréttavef Vísis má sjá viðtal við fyrirliða liðanna þær Ásgerði Stefaníu Baldursdóttur, hjá Stjörnunni, og Sonný Láru Þráinsdóttur, hjá Breiðabliki.
Upphitun fyrir leikinn hefst á Stjörnutorgi kl. 17 og þaðan verður farið með rútum á leikinn í Laugardalinn.
Viðburður á facebook
Úrslitaleikur karla í september
Það verður svo aftur nágrannaslagur þegar karlalið Stjörnunnar og Breiðabliks leika til úrslita í mjólkurbikarnum laugardaginn 15. september nk. á Laugardalsvellinum kl. 17.
Á vef KSÍ má sjá upplýsingar um öll mót sumarsins.Einnig má fylgjast með knattspyrnunni á fésbókarsíðu knattspyrnudeildar Stjörnunnar .
Meðfylgjandi myndir með frétt eru af æfingu kvennaliðs Stjörnunnar sem voru birtar á fésbókarsíðu knattspyrnudeildarinnar.