Þriðjudagsklassík í samstarfi við KÍTÓN
Tónleikaröðin Þriðjudagsklassík í Garðabæ hófst á ný þriðjudaginn 8. janúar sl. Það var bæjarlistamaður Garðabæjar 2018, söngkonan María Magnúsdóttir, sem startaði tónleikaröðinni með fyrstu tónleikum ársins í sal Tónlistarskóla Garðabæjar.
-
Þriðjudagsklassík í Garðabæ
Tónleikaröðin Þriðjudagsklassík í Garðabæ hófst á ný þriðjudaginn 8. janúar sl. Það var bæjarlistamaður Garðabæjar 2018, söngkonan María Magnúsdóttir, sem startaði tónleikaröðinni með fyrstu tónleikum ársins í sal Tónlistarskóla Garðabæjar. Með Maríu léku þau Sara Mjöll Magnúsdóttir á píanó og Sigmar Þór Matthíasson á bassa og saman fluttu þau íslensk sönglög í léttum djassbúningi auk uppáhalds djass-standarda.
Næstu tónleikar
Næstu tónleikar verða 12. febrúar nk. og bera heitið Franskir flaututónar. Það eru þær Emilía Rós Sigfúsdóttir, flautuleikari og Ástríður Alda Sigurðardóttir, píanóleikari sem leika verk eftir Saint-Saens, Gabriel Faure og C. Goddard.
Þriðju og síðustu tónleikarnir 12. mars bera heitið Á norðurslóðum en þar kemur tónlistarhópurinn UMBRA fram og flytur eigin útsetningar á norrænum þjóðlögum.
Allir tónleikar í tónleikaröðinni Þriðjudagsklassík fara fram í sal Tónlistarskóla Garðabæjar við Kirkjulund 11 og standa yfir í um klukkustund. Miðasala er við innganginn áður en tónleikarnir hefjast.
Samstarf við KÍTÓN
Tónleikaröðin Þriðjudagsklassík í Garðabæ er nú haldin í sjötta sinn. Menningar- og safnanefnd Garðabæjar stendur að tónleikaröðinni en listrænn stjórnandi frá upphafi er Ingibjörg Guðjónsdóttir. Að þessu sinni er Þriðjudagsklassík í samstarfi við KÍTÓN, félag kvenna í tónlist og gaman að geta þess að allir flytjendur eru virkir félagsmenn í KÍTÓN.