Veiðitímabilið er hafið í Vífilsstaðavatni
Veiðitímabilið í Vífilsstaðavatni stendur yfir frá 1. apríl til 15. september.
Veiðitímabilið í Vífilsstaðavatni stendur yfir frá 1. apríl til 15. september. Stangveiðileyfi í Vífilsstaðavatni eru seld með veiðikortinu á sölustöðum N1, Olís og veiðivöruverslunum um land allt. Veiðikortið má einnig kaupa á vef veiðikortsins og er kortið þá sent með pósti kaupanda að kostnaðarlausu. Veiðikortið 2022 kostar 8.900 krónur og veitir aðgang að 36 vatnasvæðum vítt og breitt um landið. Vinsamlega athugið að veiðikortið gildir eingöngu fyrir eina stöng. Bæði börn og fullorðnir þurfa að greiða fyrir veiðileyfi í Vífilsstaðavatni en börn yngri en 14 ára veiða þó frítt ef þau eru í fylgd með öðrum korthafa.
Nánari upplýsingar um veiðikortið og Vífilsstaðavatn má finna á vef veiðikortsins.
Dagsveiðileyfi í Vífilsstaðavatn er hægt að kaupa á 1000 kr. Millifært er inn á reikning 0318-26-50, kt. 5701696109 með skýringunni veiðileyfi og þá er nægilegt að sýna millifærslustaðfestingu til veiðivarða á veiðidegi. Leyfilegt er að veiða í vatninu frá kl. 8:00 til kl. 24:00. Frekari upplýsingar má nálgast í þjónustuveri Garðabæjar í síma 525-8500.
Þeir sem hyggjast stunda veiði í Vífilsstaðavatni skulu stunda góða umgengni í friðlandinu og gæta að því að raska ekki fuglalífi um varptímann.
Notið eingöngu löglelgar beitur. Heimilt er að nota flugur, maðk og spún öll önnur beita og smurefni eru stranglega bönnuð í vatninu.
Athugið að heimilt er að veiða frá suðurbakka vatnsins og austur með honum, að vestanverðu að bryggjunni. Veiðibann er á merktu svæði norðanmegin í vatninu vegna fuglaverndar og verndunar varpsvæða flórgoðans (sjá kort). Öll umferð báta og kajaka er óheimil á Vífilsstaðavatni.
Veiðimenn og aðrir gestir gangið vel og snyrtilega um friðlandið Vífilsstaðavatn og skiljið aldrei eftir rusl, girni, öngla, flotholt eða agn í vatninu eða á jörðinni þar sem það er lífshættulegt dýra- og fuglalífinu.
Öll veiði er bönnuð í Urriðavatni
Urriðavatn og lífríki þess er sannkölluð náttúruperla og mikilvægt að vernda það sem slíkt. Ástand urriðastofnsins í Urriðavatni er talið gott en stofninn er mjög viðkvæmur fyrir veiði þar sem nýliðun urriðans er takmörkuð í vatninu. Öll veiði er því bönnuð í Urriðavatni og er umferð báta og kajaka óheimil á vatninu.
Hér má sjá mynd sem sýnir verndunarsvæði flórgoðans á Vífilsstaðavatni.
