Vel mætt á Safnanótt og Sundlauganótt
Garðabær tók þátt í Vetrarhátíð með fjölbreyttri dagskrá á Safnanótt og Sundlauganótt 8. og 9. febrúar sl
-
Sundlauganótt í Ásgarðslaug
-
Sundlauganótt í Ásgarðslaug
Garðabær tók þátt í Vetrarhátíð með fjölbreyttri dagskrá á Safnanótt og Sundlauganótt 8. og 9. febrúar sl. Í tilefni hátíðarinnar voru ýmsar byggingar á höfuðborgarsvæðinu lýstar upp í grænum lit norðurljósanna og í Garðabæ var efsti hlutinn á ráðhústurninum lýstur upp og grænir ljósastaurar lýstu leiðina inn í Hönnunarsafnið og Bókasafnið á Garðatorgi.
Myndasyrpa frá Safnanótt og Sundlauganótt á fésbókarsíðu Garðabæjar.
Margt í boði á Safnanótt í Garðabæ
Á Safnanóttinni var opið hús og fjölbreytt dagskrá frá kl. 18-23 í Hönnunarsafni Íslands, burstabænum Króki og Bókasafni Garðabæjar við Garðatorg. Í Króki var hægt að fara í ratleik og fá leiðsögn á staðnum. Í Hönnunarsafninu var boðið upp á skemmtilega skuggateiknismiðju þar sem fólk á öllum aldri tók þátt í að búa til sín eigin skuggalistaverk. Á bókasafninu var boðið upp á söng barnakórs Sjálandsskóla, flottar hljómsveitir úr rytmadeild Tónlistarskóla Garðabæjar spiluðu fyrir gesti, spákonan var á sínum stað, gestir gátu fengið axlanudd og fræðst um ,,geðveikar húsmæður", ratleikurinn sló í gegn og Jón Jónsson tónlistarmaður heillaði gesti í lok kvölds einlægum flutningi.
Í ár var einnig opið hús á Bessastöðum frá kl. 19-22. Gestum var boðið upp á leiðsögn um húsakynnin, opið var í kirkjuna, Bessastaðastofu og fornleifakjallarann. Í hlaði Bessastaða var fyrsti forsetabíll lýðveldissögunnar, Packard bifreið Sveins Björnssonar árgerð 1942, til sýnis. Fjölmargir lögðu leið sína í opna húsið að Bessastöðum og forsetahjónin tóku þar sjálf á móti öllum gestum og heilsuðu með handabandi.
Myndasyrpa á vef forsetaembættisins.
Sundlauganótt í Ásgarðslaug
Sundlauganótt var haldin laugardagskvöldið 9. febrúar frá kl. 17-22 og að þessu sinni var boðið upp á dagskrá í Ásgarðslaug. Það var fallegt vetrarveður um kvöldið og margir sem lögðu leið sína í sundlaugina. Í upphafi kvölds var boðið upp á kayak-kynningu í sundlauginni sem fjölmargir sundlaugargestir nýttu sér einnig var hægt að fá örkennslu í sundtækni á staðnum. Unga kynslóðin mætti með dót í barnalaugina og einnig var hægt að fá sirkusdót í láni á staðnum. Jón Víðis töframaður sýndi listir sínar og fimleikatriði frá Sirkus Íslands sló í gegn hjá sundlaugargestum. Gestir gátu svo tekið þátt í zumba í sundlauginni og kvöldið endaði með rólegri tónlist og notalegri lýsingu.