Góð aðsókn á Safnanótt
Föstudagskvöldið 11. febrúar sl. var haldin Safnanótt á höfuðborgarsvæðinu og í Garðabæ var boðið upp á dagskrá í Hönnunarsafni Íslands, Bókasafni Garðabæjar og í Króki á Garðaholti. Um 30 söfn á höfuðborgarsvæðinu voru með opið frá 19-24 þetta kvöld og einnig var í boði dagskrá á laugardeginum og sunnudeginum í tilefni Safnanætur.
Ný sýning opnuð
Í Hönnunarsafni Íslands var formleg opnun á sýningu á húsgögnum eftir Gunnar Magnússon húsgagnahönnuð. Forseti Íslands Ólafur Ragnar Grímsson opnaði sýninguna á föstudagskvöldinu að viðstöddu fjölmenni. Síðar um kvöldið var boðið upp á leiðsögn um sýninguna í fylgd sýningarstjórans, dr. Ásdísar Ólafsdóttur. Þetta er í fyrsta sinn sem sýnd er á svo heildstæðan hátt hönnun Gunnars og að auki er þetta í fyrsta skipti sem safnið gerir ævistarfi íslensks hönnuðar skil á þennan hátt. Á heimasíðu Hönnunarsafnsins má sjá nánari upplýsingar um sýninguna.
Fræðsla og tónlist
Í bókasafni Garðabæjar var boðið upp á fyrirlestur um Vífilsstaði og tónlist. Steinar J. Lúðvíksson blaðamaður og rithöfundur flutti stuttan fyrirlestur um berklahælið að Vífilsstöðum í tilefni af 100 ára afmæli staðarins á síðasta ári. Að því loknu var gestum boðið upp á kaffi og svo tók við tónlistaratriði með Sigríði Thorlacius söngkonu úr hljómsveitinni Hjaltalín og Guðmundi Óskari Guðmundssyni á gítar. Ágætis aðsókn var í safnið þetta kvöld og margir gestir sem lögðu einnig leið sína í Hönnunarafnið um kvöldið. Á laugardeginum var boðið upp á leiklestur fyrir börn í bókasafninu og einnig var opið hús í Króki á Garðaholti.
Sjá fleiri myndir í myndasafni hér á heimasíðunni.