Fréttir: 2018 (Síða 13)

Hópurinn ,,Plokk á Íslandi“ stóð að ruslatínslu / plokki víðs vegar um landið í gær, sunnudag, í tilefni af alþjóðlegum degi jarðar. Hópurinn plokkaði meðal annars í Urriðaholti í Garðabæ og skilaði þar af sér mörgum pokum fullum af rusli.

Miðvikudaginn 11. apríl sl. var haldinn opinn fundur um fjölnota menningar- og fræðamiðstöð í Garðabæ. Á fundinum gátu íbúar tekið þátt í umræðum um hvaða starfssemi ætti heima í fjölnota menningar- og fræðamiðstöð og komið hugmyndum sínum á framfæri.

Viðhorfskönnun var send til foreldra nemenda yngri en 18 ára í Tónlistarskóla Garðabæjar í mars síðastliðnum. Markmiðið var að kanna hug foreldra til starfsins, fá ábendingar um það sem betur mætti fara og búa til vettvang fyrir foreldra til að koma nýjum hugmyndum á framfæri.

Jazzhátíð Garðabæjar hófst að kvöldi til sumardaginn fyrsta, 19. apríl sl., með tónleikum í Kirkjuhvoli, safnaðarheimili Vídalínskirkju. Gunnar Einarsson, bæjarstjóri Garðabæjar, setti hátíðina og bauð gesti velkomna. Því næst steig á svið ASA-tríó skipað þeim Agnari Má Magnússyni, Andrési Þór Gunlaugssyni og Scott McLemore. Sérstakur gestur með þeim var Jóel Pálsson saxófónleikari.

Ásgarðslaug í Garðabæ opnaði á ný sumardaginn fyrsta, fimmtudaginn 19. apríl sl. Það var fjölmennt við opnunina og margir sem biðu spenntir eftir að fá að stinga sér til sunds á ný. ,,Fósturvísarnir" félagar í karlakórnum Fóstbræðrum fluttu nokkur lög fyrir viðstadda áður en klippt var á borðan ofan í laugina og tóku einnig lagið á sundlaugarbakkanum. Ungir sundiðkendur úr Stjörnunni syntu fyrstu ferðirnar í nýju lauginni

Við opnun sundlaugarinnar í Ásgarði fimmtudaginn 19. apríl sl. á sumardaginn fyrsta var skrifað undir samstarfssamning við Embætti landlæknis um að Garðabær verði ,,Heilsueflandi samfélag". Gunnar Einarsson bæjarstjóri undirritaði samninginn fyrir hönd Garðabæjar og Alma Möller nýr landlæknir fyrir hönd Embætti landlæknis.

Listadagar barna og ungmenna verða haldnir í áttunda sinn í Garðabæ dagana 19.-29. apríl nk. Listadagarnir eru haldnir annað hvert ár í lok apríl. Að venju er boðið upp á fjölbreytta dagskrá í skólum bæjarins á öllum skólastigum þar sem uppskera vetrarins er sýnd á margvíslegan hátt.

Jazzhátíð Garðabæjar verður haldin í 13. sinn dagana 19.-21. apríl nk. Hátíðin er haldin er á vegum menningar- og safnanefndar Garðabæjar en listrænn stjórnandi hefur frá upphafi verið Sigurður Flosason tónlistarmaður. Í ár skartar hátíðin fjölbreyttu úrvali íslenskra jazztónlistarmanna af ólíkum kynslóðum og boðið verður upp á ólík stílbrigði jazztónlistar við allra hæfi.

Ásgarðslaug opnar á ný eftir endurbætur á sumardaginn fyrsta, 19. apríl nk. Endurbætur á sundlauginni í Ásgarði og rýmum innandyra er ein stærsta framkvæmdin sem hefur verið í gangi hjá Garðabæ á þessu og síðasta ári. Íbúum er þökkuð sú biðlund sem þeir hafa sýnt á meðan laugin hefur verið lokuð.

Áætlað er að opna fyrir skráningu í Vinnuskólann 1. maí næstkomandi. Vinnuskólinn er fyrir ungmenni á aldrinum 14.-16 ára, fædd árin 2002, 2003 og 2004.

Vegna uppfærslu á bókhaldskerfi Garðabæjar verður ekki hægt að sjá ýmsar upplýsingar inni á Minn Garðabær frá kl. 16:00 þann 11. apríl til kl. 8:00 17. apríl. Þessa daga verður heldur ekki hægt að nýta hvatapeninga í gegnum skráningarkerfið Nóra sem og að ekki verður hægt að skrá börn í frístundabílinn.

Föstudaginn 6.apríl sl. var nýtt aðalskipulag Garðabæjar undirritað af Gunnari Einarssyni bæjarstjóra Garðabæjar og Ásdísi Hlökk Theódórsdóttur forstjóra Skipulagsstofnunar. Nýtt aðalskipulag Garðabæjar gildir fram til ársins 2030.  Aðalskipulagið er það fyrsta sem í gildi er fyrir sveitarfélagið eftir að Garðabær og Álftanes sameinuðust um áramótin 2012 og 2013.